Nairobi, Jan, 27, 2010, (SOMINA) - Dowladda Kenya ayaa waxa ay sheegtay in howlgalada Ciidamadeeda ay ka wadaan Magaalada Nairobi ee xarunta dalka Kenya aan lagu bartilmaameedsaneyn shacabka Soomaaliyeed ee ku nool magaaladaasi.

Ra’isul wasaaraha dalka Kenya Raila Odinga oo kulan la qaatay xubno katirsan Soomaalida ku dhaqan dalka Kenya ayaa u sheegay in howlgaladii dhawaan ka dhacay dalka Kenya ee ka dhanka ahaa Muhaajiriinta Sharci darada ku joogta dalka Kenya uusan aheyn mid lagu bartilmaameedsanayay Soomaalida ku dhaqan dalka Kenya.

Waxa uu sidoo kale xaqiijiyay Ra’isul Wasaare Odinga in dadka Soomaalida ah ee ku haysta Ganacsiga Sharciga ah Dalka Kenya ay xor u yihiin in markasta oo ay cabsi dareemaan ay cabashadooda soo gudbiyaan.

Ma jiro qorshe u qarsoon Dowladda Kenya oo dhanka ah xubnaha bulshada Soomaaliyeed isagoona sheegay in ay soo dhaweenayaan maalgalinta ay Dalka ku sameeyeen ayuu yiri Ra’isul Wasaare Odinga.

 Sidoo kale Ra’isul wasaare Raila Odinga ayaa waxa uu Dowladda Mareykanka ugu baaqay in ay gacan ka geysato sameynta gar gaar Caalami ah oo loo fidinayo Dowladda KMG ah, isagoo sheegay in dawada ugu haboon ee looga hortagi karo kooxa burcad badeeda iyo amni darada ka jirta Dalka Soomaaliya ay tahay in la taageero Dowladda KMG ah ee Soomaaliya.

Waxa uu intaasi ku daray in Dowladda Kenya ay sii wadi doonto kaalinta kaga aadan Dowladaha Soomaaliya iyo Suudan.

Xubnihii uu kulanka la qaatay Ra’isul Wasaare Odinga ayaa sheegay in aysan diidaneyn qabqabshada dadka sharci darada ku jooga Dalka Kenya, balse ay ka cabsi qabaan in bartilmaameedku uu yahay Soomaalida ku dhaqan dalka Kenya iyo Ganacsigooda.

Si kastaba ha ahaatee hadalka Ra’isul Wasaare Odinga ayaa imaanaya xilli ay Dowladda Kenya sheegtay in aysan joojinayeyn howlgalada lagu qabqabanayo dadka Soomaaliyeed ee aan sharciga heysan, waxaana Xabsiyada Dalka Kenya laga soo sheegayaa daruufo adag oo ay ku suganyihiin dadkii dhawaan Ciidamada Kenya ku qabqabteen howlgalada ka dhanka ahaa Soomaalida sharci darada ku jooga Dalka Kenya.