Muqdisho,Dec,24 2009, 04:36 PM-ET,(SOMINA)- Ciidamada Maamul Goboleedka Puntland iyo kuwa maamulka deriska ay yihiin ee Galmudug ayaa ku dagaalamay magaalada Gaalkacyo ee xarunta Gobolka Mudug, waxaana ay dagaaladii maanta sababeen dhimashada  ugu yaraan 10 qof iyo dhaawaca intaas ka badan, sidaas waxaa xaqiijiyay goobjoogayaal.

Dagaalka ayaa yimid ka dib markii suuqa magaalada Gaalkacyo ay rag hubeysan oo loo badiyay iney dhinaca koonfurta ka yimaadeen ku dileen askari ka tirsanaa ciidanka Dowladda hoose ee Puntland u qaabilsan Gaalkacyo.

Magaalada waxa ay u kala qeybsantaa laba qeybood oo dhinac ay maamusho Dowlad Goboleedka Puntland halka dhinaca kalana ay joogaan Maamulka Galmudug, waxaana beryihii danbe labada dhinac ka dhex taagnaa xiisad.

“tobon qof wey dhinteen inta aan aragnay,waxaana jiray madaafiiic culus oo la isweydaarsaday” ayuu yiri Maxamed Cilmi oo ah Goobjooge ku sugan Gaalkacyo.

“Dagaalku wuxuu sidoo kale geystay dhaawac badan oo lakala geeyay isbitaalada kukala yaal dhinacyada koonfurta iyo waqooyiga magaalada, welina wuu socdaa oo qasaaraha wuu sii badan karaa” ayuu hadalkiisa sii raaciyay.

Ma jiro wax war ah oo ay ka soo saareen mas’uuliyiinta labada maamul Goboleed ee deriska ah, iyo cid isku howshay qaboojinta xiisadda keentay dagaalka.

Dagaalkan oo kale kama dhicin sanadihii u danbeeyay guud ahaan magaalada Gaalkacyo sida ay ku warameen odayaasha deegaanka, oo tilmaamaya ineysan wali cadeyn sababta keentay dagaal qasaarahan geystay.

MF.MB