Muqdisho,Dec,19 2009, 03:25 PM-ET,(SOMINA)- Ugu yaraan hal qof ayaa ku naf baxay shan kalana wey dhaawacmeen ka dib markii uu dab weyn maanta qabsaday garaash shidaalka lagu iibiyo oo ku yaal agagaarka KM5 ee Muqdisho, waxaana sidoo kale halkaas ku baaba’ay hanta fara badan oo ay lahaayeen ganacsatadii shidaalka iibineysay.

Goobjoogayaasha iyo wariyaasha tagay goobta uu dabku ka kacay ayaa sheegaya in qofka dhintay iyo kuwa dhaawacmay aysan ku waxyeeloobin dabka kacay ee ay haleeshay rasaas ay fureen ciidamada amaanka ee Dowladda oo isku dayayay iney xakameeyaan dhaqdhaqaaqa dadka meesha soo buuxdhaafiyay.

Gudoomiye ku xigeenka maamulka Gobolka Banaadir ayaa xaqiijiyay in dadaal dheer ka dib ay ku guuleysteen in dabka la demiyo, isaga oo xusay iney u yeerteen booyadaha dab demiska ee ciidamada AMISOM, sidaasna looga hortagay in dabku sii faafo.

“runtii waxaa na soo gaaray qasaare weyn oo hantideenii oo ahayd shidaalka goobta yaal guud ahaan wey naga baaba’day” ayay tiri Wiilo Xaashi Naxar oo ka mid ahayd ganacsatada ay goobtooda dabku ka kacay.

Dabka waxa uu bilowgii ka kacay garaash weyn oo ay yaalaan booyado shidaal ah oo halkaas lagu iibiyo, hase ahaatee mar qura ayaa hawada qiiq galay, waxaana uu dabku ku faafay deegaanadii ka agdhowaa oo uu gaaray.

Goobaha uu dabku saameynta ku yeeshay ee qeyb ka mid ah gubatay waxaa ka mid ah Hoteelka weyn ee Amiira oo goobta ka agdhowaa kaas oo ay degan yihiin siyaasiyiin ka tirsan Dowladda Soomaaliya.

Mas’uuliyiinta Dowladda Soomaaliya oo ay ku jiraan wasiirka Arimaha Gudaha iyo wasiiro Dowlaha Gaashaandhigga ayaa ku jiray shaqsiyaadka goobta tagay si ay uga qeyb qaataan howlaha lagu baqtiinayo dabka qabsaday goobtaas.

Dabkan oo aan la ogeyn sababta uu ka dhashay ayaan ahayn kii u horeeyay ee ka kaca goob ay leeyihiin ganacsatada Soomaaliyeed, waxaana hore dhowr jeer u gubtay suuqa weyn ee Bakaaraha ee Magaalada Muqdisho oo ay ku basbeeshay hanta fara badan.

MF.MB