Muqdisho, Nov,28 2009, 08:03 PM-ET,(SOMINA)-Kooxda Alshabaab ayaa qabsatay magaalo u dhow xadka Kenya halkaas oo ay gacanta ku dhigeen  iyadoo aan wax dagaal ah ka dhicin, ka dib markii ay degmadaas isaga bexeen ciidanka kooxda Xisbul Islaam, sidaas waxaa xaqiijiyay dadka deegaanka.

Goobjoogayaal ayaa u sheegay wakaaladda wararka Soomaaliyeed ee SOMINA in dagaalyahano aad u hubeysan oo ka tirsan kooxda lala xariiriyo Alqaacidda ee Alshabaab ay maanta oo Sabti ah soo galeen magaalada Dhoobleey ee ku taal dhanka koonfureed ee Soomaaliya kaabigana ku haysa xadka ay wadaagaan dalalka Kenya iyo Soomaaliya.

Ciidanka Xisbul Islaam ee deegaanadaas ay ku dagaalamayeen kooxda Alshabaab ayaa isaga baxay Dhoobleey ka hor inta aaney Alshabaab magaaladaas qabsan. Labada koox oo awal si wadajir ah ula dagaalami jiray Ciidanka Dowladda Soomaaliya iyo kuwa AMISOM ayaa mudooyinkii la soo dhaafay ku dagaalamayay gobolada Jubooyinka waxaana dagaaladii u danbeeyay ay iskaga dileen in ka badan 15 dagaalyahan oo labada dhinac ka tirsan.

Dadka deegaankaas ku noolaa ayaa badankood isaga huleelay guryahooda cabsi ay ka qabaan in gacan ka hadal uu ka dhoco magaalada oo ay soo rogaal celiyaan Malayshiyada Xisbul Islaam, waxaana dadku ay u qexeen xeryo qaxooti oo ku yaal dalka Kenya oo ay hore u buux dhaafiyeen kumanaan dad Soomaaliyeed ah oo ka soo cararay dagaalada ka socda koonfurta Soomaaliya siiba magaalada caasimadda ah ee Muqdisho.

Kenya ayaa ciidan xoogan soo dhigtay xadka ay la wadaagto dalka sharci la’aanta ah ee Soomaaliya si ay isaga difaacdo weerar kasta oo ay macquul tahay inuu uga yimaado dhanka kooxda Alshabaab.

“ciidankeenu waxay xaadir ku yihiin xadka weyna iska daafici doonaan weerar kasta oo kooxahaas dalkeena ay u gaysan karaan” ayuu yiri wasiirka gaashaandhigga ee Kenya Yuusuf Xaaji.

Mar aan sidaas u sii fogeyn ayaa sarkaal sare oo ka tirsan kooxda Alshabaab ee xagjirka ah waxa uu ugu hanjabay Kenya iney weeraro ka dhan ah ka fulin doonaan haddii aysan faraha kala bixin arimaha Soomaaliya gaar ahaan ciidamada dalkeeda loogu tababarayo dowladda Soomaaliya.

MF.MB