Muqdisho, Nov,26 2009, 09:46 AM-ET,(SOMINA)- Laba wariye oo ajnabi ah oo la sii daayay ka dib muddo 15 bilood ah oo ay gacanta ugu jireen dableey Soomaaliyeed ayaa maanta ka dhoofay garoonka diyaaradaha ee Muqdisho iyaga oo gaaray dalka Kenya, sidaas waxaa xaqiijiyay wasiirka Amniga qaranka.

Saaka waabarigii ayaa diyaarad gaar ah waxa ay ka qaaday garoonka Muqdisho, Amanda Lindhout oo ah saxafiyad u dhalatay dalka Canada, iyo Nigel Brennan oo ah sawirqaade u dhashay dalka Australia.

“saxafiyiintan waxaa la sii daayay shalay gelinkii danbe, nasiib wanaag hadana waxa ay u dhoofeen si nabad ah” ayuu yiri wasiirka Amniga Qaranka Cabdulaahi Sanbaloolshe.

“waxaa la sii daayay ka dib markii dableeydii haysatay shalay la gaarsiiyay lacag dhan $700,000 ( Todobo Boqol oo kun),” ayuu wasiirku hadalkiisa sii raaciyay.

Wararka ayaa sheegaya in labadan wariye sii deysmadooda ay ka qeybqaateen xildhibaano ka tirsan Baarlamaanka Soomaaliya, waxaana markii la sii daayay isla xalay la dejiyay hoteelka Saxafi ee Muqdisho oo ay saaka ka qaadeen ciidamo badan oo ka tirsan Dowladda iyo ciidanka AMISOM oo geeyay garoonka diyaaradaha ee Muqdisho si ay qaab nabad ah uga dhoofaan.

“aad baan ugu faraxsanahay inaan xoriyadeydii helay, waana caafimaad qabaa, waxa aan u mahadcelinaa inta sii deysmadeyda ka qeybgashay qoyskeygana la’aantood ma heleen xoriyadan” ayay Lindhout u sheegtay idaacadda BBC-da.

“maya maya, waxaas waxba kama jiraan, aniga waan cafimaad qabay wax walbana waa Ok” ayay tiri Lindhout oo beenineysa warar la isla dhexmarayay oo sheegayay in ay kooxihii haystay ay iyada uureeyeen oo ay cunug u dhashay intii ay gacantooda ku jirtay.

Wax faahfaahin ah lagama hayo goobta lagu haystay saxafiyiintan oo xaalad adag la kulmay waqtigii ay gacanta ugu jireen dableeyda Soomaalida ah, balse warar ayaa sheegaya in haatan laga keenay dhanka koonfureed ee Muqdisho marka la sii deynayay.

Hay’adda saxafiyiinta aan xaduudda laheyn RSF ee fadhigeedu yahay magaalada Paris, ayaa dhowaan sheegtay in saxafiyadda Lindhout ay la shaqeyn jirtay TV-ga laga leeyahay dalka Faransiiska ee France24 iyada oo sawirqaade Brennan uu ahaa sawirqaade madax banaan.

Lindhout oo u dhalatay Canada iyo Brennan oo u dhashay Australia ayaa dableey hubeysan waxa ay afduubteen bishii August ee sanadkii 2008 iyaga oo howlo shaqo u joogay deegaanka ceelasha biyaha, waxaana lala afduubtay weriye Soomaali ah iyo darawalkii waday balse bishii January ee sanadkan ayaa labadaas qof ee Soomaalida ah la sii daayay.

Dalka Soomaaliya oo aan laheyn dowlad dhexe tan iyo wixii ka danbeeyay sanadkii 1991-kii oo talada laga eryay Maxamed Siyaad Barre ayaa haatan waxa uu ka mid yahay dalalka ugu halista badan ee lagu waxyeeleeyo suxufiyiinta ajnabiga ah iyo kuwa Soomaalida ah iyo sidoo kale shaqaalaha hay’adaha Gargaarka ka shaqeeya.

MB.MF