Muqdisho, Nov,23 2009, 09:22 AM-ET,(SOMINA)- Inta la ogyahay 10 qof oo rayid ah ayaa la xaqiijiyey iney geriyoodeen 20 kalena ay ku dhaawacmeen dagaal iyo duqeymo barbar socday oo shalay galinkii danbe ilaa xalay ka dhacay magaalada caasimadda ah ee Muqdisho.

Dagaalka ayaa bilowday ka dib markii ay xoogaga Xisbul-Islaam weerareen fariisimo ay ku sugnaayeen ciidamada Dowladda Soomaaliya iyo kuwa AMISOM,waxaana madaafiic lagu garaacay degmooyinka Howlwadaag, Wardhiigleey iyo Dayniile.

Dadka ku dhintay dagaalka iyo kuwa ku dhaawacmay ayaa waxay ahaayeen rayid ay xaafadohooda madaafiicdu ugu tagtay, sida ay ku waramayaan saraakiisha dhanka caafimaadka ee Muqdisho.

Wararka ayaa sheegaya in madaafiicda oo dhaceysa xilli habeen ah ay sababtay in dadkii ku dhaawacmay ay guryahooda ku nafbexeen ka dib markii ay waayeen cid u gurmatay oo u qaada Cisbtaalada si loo daweeyo.

Sarkaal u hadlay ururka Xisbul Islaam ayaa guulo ka sheegtay dagaalkii xalay ka dhacay Muqdisho oo ahaa kii ugu cuslaa ee bilihii la soo dhaafay ka dhacay caasimadda.

Hase ahaatee afhayeenka Militeriga Dowladda ayaa beeniyey jiritaanka guulo ay gaareen kooxaha Mucaaradka, wuxuuna xusay iney ciidankoodu iska difaacay weeraro lagu soo ekeeyay.

Goobjoogayaasha ayaa ku waramaya inuu jiro qasaare kala gaaray labada dhinac ee dagaaladu ay dhexmareen, inkastoo aan si dhab ah loo heyn tirada ay iska dileen.

Dagaalada iyo duqeymaha ka dhaca magaalada Muqdisho ayaa inta badan saameyn ku yeesha oo ay waxyeeladfa ugu daran ka soo gaartaa dadka rayidka ah eek u nool magaalada caasimadda ah ee Muqdisho.

MF.MB