Baydhabo, mar,07(SOMINA)- Suuqayada magaalada Baydhabo ee xarunta gobolka Bay ayaa maalmihii la soo dhaafay si weyn looga dareemay hoos u dhac ku yimid ascaarta kala duwan ee quuturl-daruuriga ah iyo sarifka lacagaha qalaad,waxaana arintani si weyn u soo dhaweeyay dadka danyarta ah iyo kuwa muruqmaalkaba.

Sumayo Xasan waxa ay ka mid tahay shacabka reer Baydhabo waxa ay iiga xog warantay dhibaatadii ay ku qabeen qiimaha ascaarta oo ahaa mid ay awoodi kari weysnaayeen, hase ahaatee waxay dareen farxadeed ka muujisay qiima dhaca ku yimid raashiinka.

“ Haa runtii arintaan si weyn ayay inoo farxad galinaysaa, sababtoo ah waxaa dhici jirtay bilihii la soo dhaafay in lagacaha aanu heysano ay ku filnaan waayaan qiimaha xilligaasi la kala siisanayay raashinka” ayay tiri Sumayo Xasan mar aan kula kulmay gudaha suuqa Baydhabo.

Ganacsatada magaalada ayaa laf ahaantooda ka hadlay sababaha hoos u dhaca qiimaha raashiinka,sababta ay ku sheegeen kuwa amaan iyo canshuurtii laga qaadi jiray ganacsatada oo la joojiyay.

“waxa keenay hoos u dhaca badeecaddeena waxa ay tahay sida aad la socotiin waxaa ay Xoogaga Al-shabaab qaadeen isbaarooyin badan oo lacago baad ah naloogaga qaadan jiray, sidoo kalena maamulka Islaamiga ee Shabaabku waxa ay joojiyeen canshuurtii hore ee ay naga qaadi jireen maamulkii hore ee gobolka, marka anagana sidaas ayaan ku yareynay qiimihii aan hore badeecadeena u siin jirnay” sidaas waxaa sheegay Ganacsade Cali Xassan.

Ganacsadahan ayaa sheegay in isbadalkani yahay mid rajjo geliyay ganacsatada oo ay doonayaan inay ganacsigooda hormariyaan.

Isagoo intaasi ku daray in maalin walba Baydhabo ay soo gaaraan gawaarida xamuulka sida ee ka imaanay magaalada Muqdisho, kuwaasi oo bilihii la soo dhaafay baqdin ka qabay dhibaatooyin ka soo gaari kara kooxo hubeysan oo jid gooyooyin dhigtay wadada isku xirta magaalooyinka Muqdisho iyo Baydhabo, balse iminka ay ka saareen xoogaga Al-shabaab.

Daba-yaaqadii sanadii tagtay iyo horaantii sanadkan ayaa waxaa si weyn suuqyada Gobolka Bay gaar ahaan kan magaalada Baydhabo laga dareemayay sare u kac baahsan oo ku aadan qiimaha raashinka iyo sarifka lacagaha qalaad,waxaana taasi ay saameyn xoogan ku abuurtay dadweynaha danyarta ah.

Abdalla Mohamed Nur